በስመ አብ ወወልድ ወመንፈስ ቅዱስ አሐዱ አምላክ፤

በሀገር ውስጥና በውጭ ሀገር የምትገኙ የኢትዮጵያ ኦርቶዶክስ ተዋሕዶ ቤተ ክርስቲያን ምእመናን ወምእመናት በሙሉ እግዚአብሔር አምላካችን እንኳን ለሁለት ሺሕ ዐሥር ዓመተ ምሕረት የቅድስት ድንግል ማርያም ተዝካረ ጾም በሰላም አደረሳችሁ፡፡

“ወአፅገቦሙ እምበረከቱ ለርኁባን
የተራቡትን ከበረከቱ አጠገባቸው፤”
(ሉቃ. 1፥53)

ይህ ቃል፤ መንፈሰ እግዚአብሔር በቅድስት ድንግል ማርያም ልሳን በኩል ያስተላለፈው መለኮታዊ ቃል ነው፡፡ የቃሉ መሠረታዊ መልእክት በድንግል ማርያም ማሕፀን ካደረው ከጌታችን ከመድኀኒታችንና ከአምላካችን ከኢየሱስ ክርስቶስ ነገረ አድኅኖ ጋር በቀጥታ የተያያዘ ነው፤ ረኃብ የሚለው ቃል ሰፋ ተደርጎ ሲታይ በረኃበ ሥጋ ላይ ብቻ ሳይሆን በሰው ልጅም ሆነ በሌሎች ሕያዋን ፍጡራን የሚከሠት የመሠረታዊ ፍላጎት ዕጥረትን የሚገልጽ ነው፡፡ ይህም የዕውቀት፣ የጤና፣ የመንፈሳዊ ሕይወት፣ የሞራል፣ የሰላም አለመረጋጋትን የሚያከስትሉ የህልውና ጣዕም ዕጥረቶችን በሙሉ ሊያመለክት ይችላል ማለት ነው፡፡

በተለይም በአምሳለ እግዚአብሔርና፣ በአርኣያ እግዚአብሔር የተፈጠረውና ሕያው መንፈስ ያለው የሰው ልጅ ከመንፈሳዊ ሕይወት ርቆ ከእግዚአብሔር ጋር ያለውን ግንኝነት ሲያቋርጥ ከባድ የሆነ መንፈሳዊና ሞራላዊ ረኃብ ያጠቃዋል፡፡ ይህ ዐይነቱ ረኃብ ከሁሉም የባሰ ጎጂ ረኃብ ነው፤ ሰው በአምላኩ እስካመነ ድረስ በጸሎትና በሃይማኖት ፈጣሪውን ተማፅኖ በፈጣሪ በረከት ተግባሩ ሰምሮለት ረኃበ ሥጋንና ሌሎች መሰል ዕጥረቶችን ሊያስወግድ ይችላል፡፡ ከእግዚአብሔር በመለየቱ የሚያጋጥመው ረኃበ ነፍስ ግን በዚህ ዓለም ባለበት ጊዜ ጎልቶ ባይታይም በወዲያኛው ዓለም የከፋ ረኃበ ነፍስ ያገኘዋል፤ ጌታችን ኢየሱስ ክርስቶስ “እናንተ አሁን የምትራቡ ብፁዓን ናችሁ ትጠግባላችሁና፤ እናንተ አሁን የጠገባችሁ ወዮላችሁ ትራባላችሁና” ሲል ያስተማረው ረኃበ ሥጋውን ከፅጋበ ነፍስ፣ ፅጋበ ሥጋን፣ ከረኃበ ነፍስ አዟዙሮ በማነፃጸር እንደሆነ መረዳት ይቻላል፡፡ ከዚህ አኳያ ሲታይ ከረኃበ ሥጋ ይልቅ ረኃበ ነፍስ እጅግ በጣም ከባድ እንደሆነ እናስተውላለን፤ በሌላ በኩል ረኃብ ማለት የእግዚአብሔርን ቃል ያለመስማት እንደሆነ ሲያመለክት እግዚአብሔር በነቢዩ አድሮ “ረኃብሰ ኢሰሚዐ ቃለ እግዚአብሔር፣ ረኃብ ማለት የእግዚአብሔርን ቃል ያለመስማት ነው ብሎአል” ከዚህ አንጻር መንፈስ ቅዱስ ባደረባት እግዚአብሔር ወልድ ማሕፀኗን መንበረ መንግሥት ባደረገላት በቅድስት ድንግል ማርያም ልሳን የተጠቀሰው ረኃብና ጽጋብ የትኛው ነው ብለን ብንጠይቅ መልሱ ከባድ አይሆንም፤ እግዚአብሔር የፍጥረቱን ረኃበ ሥጋ የማይሻ ሩኅሩኅ አባትና ፈጣሪ ቢሆንም ከሥጋዊ ይልቅ ለመንፈሳዊ፣ ከጊዜያዊ ይልቅ ለዘለዓለማዊ ሕይወት እንደሚያደላ የታወቀ ነው፤ ለሰው ልጅ ሁሉ ቤዛ ይሆን ዘንድ ወደዚህ ዓለም የመጣበት መሠረታዊ ዐላማም ይኸው ነው፤ ከዚህ አኳያ ከላይ የተጠቀሰው በረከት ከበረከተ ሥጋ በላይ የሆነ በረከተ ነፍስን የሚያመለክት ነው፡፡

ክርስቶስ ሰው ከመሆኑ በፊት በዓለም ሁሉ ተንሰራፍቶ የነበረውና መድኀኒት ያልተገኘለት የምግብ ረኃብ ሳይሆን የመንፈሰ ልደትና የመንፈሰ ሕይወት ዕጦት ነው፤ ይህ ዕጦት ነው ረኃብ ተብሎ የተገለጸው፣ ቅዱስ ገብርኤል ሊያበሥር የመጣውም መንፈሳዊ በረከትን፣ እርሱም ከእግዚአብሔር ጋር በሐዲስ ልደት መገናኘትን፣ ለሰው ልጅ ሁሉ የሚናኝበት ዕድል ከእግዚአብሔር የተዘጋጀ መሆኑን በቅድስት ድንግል ማርያም በረከት በኩል ሊያበሥር ነው፤ የበረከቱ መጀመሪያ ቅድስት ድንግል ማርያም መሆኗን ለማሳየትም እግዘአብሔር ካንቺ ጋር ነው በማለት ገልጾታል፡፡ እንግዲህ ትልቁ ረኃብ እግዚአብሔርን ማጣት፣ ትልቁ በረከት ደግሞ እግዚአብሔርን ማግኘት እንደሆነ ከዚህ መረዳት ይቻላል፤ ከቅድስት ድንግል ማርያም በፊት የነበረው ዘመን ዓመተ ፍዳ ፣ ዓመተ ኵነኔ በመሆኑ በእነዚያ ዘመናት የነበረው ትውልድ ሁሉ ከረኃበ ሥጋ ይልቅ መንፈሳዊ ረኃብ ያጠቃው ነበረ፤ በምድራዊ ሕይወቱም በአምልኮ ጣዖት፣ በክሕደት፣ በብልሹ ሥነ ምግባር፣ በቀቢጸ ተስፋ፣ በጽልመተ አእምሮ የተዋጠ፣ በሰማያዊ ሕይወቱም በኵነኔ ነፍስ በግዞት ከሰይጣን ሠራዊት ጋር በሥቃይ የሚማቅቅ ነበረ፤ ይህ ሁሉ በግዙፉ ዓለም ከሚታወቀው ረኃበ ሥጋ የባሰ ነበረ፤ ቅድስት ድንግል ማርያም በመንፈስ ቅዱስ ተሞልታ የተናገረችው ረኃብ እሱ ነው፤ በረከቱም በማሕፀኗ የተሸከመችው ምሉአ ጸጋ ኢየሱስ ክርስቶስ ነው፤ ከበረከቱ አጠገባቸው የተባሉትም በእሱ አምነው የተጠመቁ፣ በደሙ ነጽተው ከሱ ጋር የተዋሐዱ ናቸው፤ ይህንን ያደረጉ ምእመናን ከእግዚአብሔር ጋር በትክክል ተገናኝተዋል፤ በረከቱም በምልአት አድሮባቸዋል፡፡ ምድራዊ ረኃብ እንኳ ቢያጋጥማቸው በሰማያዊ ተስፋ ተሞልተው ሁሌም እንደጠገቡ፤ በሰማያዊውም ዓለም ከእርሱ ጋር ነግሠው ከብረው በደስታ ይኖራሉ።

የተወደዳችሁ የመንፈስ ቅዱስ ልጆቻችን፤

የቅድስት ድግል ማርያም በዓለ ፍልሰታን በማሰብ፣ በይቅርታ፣ በምሕረት፣ በጸሎት፣ በአምልኮት፣ በስግደት፣ ቅዱስ ቊርባንን በመቀበል፣ የምንጾመው ጾም ዋና ዐላማው ከእግዚአብሔር ጋር ለመገናኘት ነው፤ ምክንያቱም ከእግዚአብሔር ጋር ግንኑነት ሲኖረን የሚጐድለን ነገር እንደሌለ እናውቃለንና፤ ቅዱሳን ሐዋርያት በዚህ ወቅት ጾመው እግዚአብሔርንም ቅድስት ድንግል ማርያምንም አግኝተዋል፤ እኛም እግዚአብሔርንም ቅድስት ድንግል ማርያምንም ለማግኘት እንጾማለን እናገኛቸውማለን ለዚህም ምስክራችን ግዙፉ ንጻሬ ዐይን ሳይሆን ረቂቁ ንጻሬ መንፈስ ነው፤ ፈጣሪዋን የምትከተል መንፈስ ምን ጊዜም ነፃና ደስተኛ ናት፤ ስለዚህ ይህንን ጾም ወጣት ሽማግሌ፣ ሕፃን ዐዋቂ ሳይባል ሁሉም እግዚአብሔርንና ቅድስት ድንግል ማርያምን በመሻት ፍቅርንና መታዘዝን፣ ሰላምንና አንድነትን እንደ ሸማ በመጎናጸፍ ሁሉም ሊጾመው ይገባል፡፡ ከብዙ ውጣ ውረድ በኋላ እየታየ ያለው ተስፋ ሰጭ የሆነ የሀገራችን ሰላምና የመግባባት መንፈስ ሥር እንዲሰድ አጥብቀን ወደ ፈጣሪ የምንጮኽበት ጾም ሊሆን ይገባል፡፡ በተለይም በሰው ሠራሽ ምክንያቶች ከቀያቸው የተፈናቀሉና ጕዳት የደረሰባቸው ወገኖችን እንደዚሁም በሌላ ምክንያት የኑሮ እጥረት ያጠቃቸው ድሆችን ካለን ከፍለን በመመገብና በማልበስ ለእግዚአብሔር እንታዘዝ፤ ለወገኖቻችንም እንድረስ ፡፡

የዘንድሮ የጾመ ማርያም ሱባዔን ልዩ የሚያደርገው ለረጅም ጊዜ ተለያይተው የቆዩ የቤተ ክርስቲያናችን አባቶች መከፋፈሉ ቀርቶ በሰላምና በአንድነት ሆነው ሃይማኖታቸውን ሕዝባቸውንና ሀገራቸውን ለማገልገል በተስማሙበት ማግስት፣ እንደዚሁም ዓለም ከተፈጠረ ጀምሮ በአንድነት የነበሩትና ተለያይተው የማያውቁት የኢትዮጵያና የኤርትራ ሕዝቦች በሰላም ለሰላም ተባብረው ለመኖር ቃል በገቡበት ታሪካዊ ወቅት ላይ የሚጾም ጾም መሆኑ ነው፤ ይህ ለሕዝባችን ለሀገራችን ለሃይማኖታችን የተሰጠ ታላቅ አምላካዊ በረከት ነው፤ ይህ የሰላም የፍቅርና የአንድነት በረከት በከፍተኛ ጥንቃቄ ልንጠብቀው ይገባናል፤ ከእንግዲህ ወዲህ የሚፈናቀል ሕይወቱንም ሆነ ንብረቱን የሚያጣ ሰው እንዳይኖር፣ ያለፈው ይብቃ ማንኛውም ኢትዮጵያዊ ዜጋ ተወልዶ ያደገባትና እናት ሀገሬ ናት ብሎ የሚኮራባት ኢትዮጵያ የሥጋት አገር እንዳትሆንበት አጥብቀን እንሥራ፣ እንጸልይ፣ እናስተምር ሁሉም ኢትዮጵያዊ ከሰላም፣ ከፍቅር፣ ከአንድነት፣ ይቅር ይቅር ከመባባል የተሻለ አጀንዳ እንደሌለ ዐውቆ ሰላም የየቀኑ ሳይሆን የየሰዓቱ አጀንዳ አድርጎ እንዲሠራ ከአደራ ጋር መንፈሳዊና አባታዊ መልእክታችንን በእግዚአብሔር ስም እናስተላልፋለን፡፡

መልካም ጾም ያድርግልን እግዚአብሔር ኢትዮጵያንና ሕዝቦቿን ይባርክ ወስብሐት ለእግዚአብሔር አሜን፡፡

ሐምሌ 28 ቀን 2010 ዓ.ም. አራተኛው ፓትርያርክ ብፁዕ ወቅዱስ አቡነ መርቆሬዎስ በሲኖዶሳዊ ዕርቅ፣ በሰላምና በአንድነት ወደ ሀገራቸው መግባታቸውን አስመልክቶ መንግሥት በሚሊኒየም አዳራሽ ከፍተኛ አቀባበል ተደርጎላቸዋል፡፡ መርሐ ግብሩን አስምልከተው ብፁዕ ወቅዱስ አቡነ ማትያስ ቀዳማዊ ፓትርያርክ ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለሃ ይማኖት የሚከተለውን አባታዊ መልእክት አስተላልፈዋል፡፡

በስመ አብ ወወልድ ወመንፈስ ቅዱስ አሐዱ አምላክ፤

“እምይእዜሰ ይኩን ሰላም — ከዛሬ ጀምሮ ሰላም ይሁን፤» ሰላም ይስፈን በመላዪቱ ሀገራችን፤ ሰላምና ፍቅር አንድነት ይስፋፋ”

ክቡር የኢፌድሪ ፕሬዚዳንት ዶክተር ሙላቱ ተሾመ፣
ብፁዕ ወቅዱስ አቡነ መርቆሬዎስ 4ኛ የኢትዮጵያ ፓትርያርክ፣
ብፁዓን አበው ሊቃነ ጳጳሳት፣
ክቡራን ሚኒስትሮችና አምባሳደሮች፣
ክቡራን ሊቃውንተ ቤተ ክርስቲያን ማኅበረ ካህናት፥
ክቡራን የመንፈስ ቅዱስ ልጆቻችን፣ በአጠቃላይ በዚህ የአንድነትና የዕርቅ ማብሠሪያ መርሐ ግብር ላይ የተገኛችሁ ሁላችሁ፤

«እምይእዜሰ ይኩን ሰላም — ከዛሬ ጀምሮ ሰላም ይሁን፤» ሰላም ይስፈን ተብሎ የተነገረው ቃል ለሁለት ተከፍለን በነበርነው አባቶች መካከል ዕርቅ ወርዶ እውን ሆኖ፥ ሥምረት አግኝቶ ለዚህ የአንድነታችንና የደስታችን ዕለት ማብሠሪያ ቀን በመድረሳችን ከሁሉም በላይ የሰላም የአንድነት እና የፍቅር አምላክ እግዚአብሔር ይመስገን፡፡

እንዲሁም ያለፈው የመለያየት ጊዜ አብቅቶ ሰላም ተገኝቶ ብፁዕ ወቅዱስነትዎ እና ብፁዓን አባቶች ወደምትወዷትና ስትናፍቋት ወደነበረችው ቅድስት ሀገራችሁ በመምጣት በዚህ ሁኔታ አንድ ሁነን በመንፈስ ቅዱስ ልጆቻችን ፊት ለመቆም ያስቻለንን እግዚአብሔርን ደግመን እናመሰግነዋለን፡፡

በዚሁ ሳምንት ሐምሌ 25 ቀን 2010 ዓ.ም ረቡዕ ዕለት ቅዱስነታቸውን ከቦሌ ኤርፖርት ተቀብለን በቀጥታ ወደ መንበረ ጸባኦት ቅድስት ሥላሴ ካቴድራል ሄደን ሰፊ የሆነ የአቀባበል ሥነ ሥርዐት እንደተፈጸመ የሚታወስ ነው፡፡

ዛሬ ደግሞ በክቡር ዶ/ር ዐቢይ አሕመድ የኢትዮጵያ ጠቅላይ ሚኒስትር ጋባዥነት ተመሳሳይ የአቀባበል በዓል ለማክበር በዚህ በሚሊንየም አዳራሽ ተሰብስበናልና አምላካችን እግዚአብሔር የተመሰገነ ይሁን፡፡

በሀገር ውስጥም ሆነ በመላው ዓለም የምትገኙና እንዲሁ በዚህ ዐቢይ ጉባኤ የተገኛችሁ ሁላችሁ ሐዋርያዊት ጥንታዊትና ታሪካዊት የሆነችው የኢትዮጵያ ኦርቶዶክስ ተዋሕዶ ቤተ ክርስቲያን በረጅሙ የታሪክ ጒዞዋ በሃይማኖት መሪዎቿ መንፈሳዊ ብርታት፣ በሊቃውንቶቿ ትምህርት፣ በካህናቶቿ አገልግሎትና በምእመናን ተከታዮቿ ጽንዐ-ሃይማኖት ህልውናዋና አንድነቷ ተጠብቆ መኖሩ ሁሉም የሚያውቀው ነው፡፡

ቤተ ክርስቲያናችን ታሪኳንና ባህሏን ጠብቃ ለረዥም ዘመን ልትዘልቅ የቻለችበት ዐቢይ ምሥጢር፣ የቤተ ክርስቲያን አባቶች በነበራቸው የማይበገር የአንድነት ጽናት አንደሆነ ጥርጥር የለውም፡፡ይሁንና ላለፉት ሁለት ዐሥርተ ዓመታት በተለያዩ ምክንያቶች አለመግባባት በመፈጠሩ የቤተ ክርስቲያናችን መንፈሳዊ አመራር ለሁለት ተከፍሎ ቆይቶ ነበር፡፡

እንደሚታወቀው የሰላምና የአንድነት መሪና አስተማሪ ሆና ለዘመናት ሕዝቧን ስትመራ የኖረችው ቅድስት ቤተ ክርስቲያናችን በዘመናችን ሰላምንና አንድነትን ማጣቷ መላውን የቤተ ክርስቲያን ልጆች በእጅጉ ያሳዘነና ያሳሰብ ዐቢይ ጉዳይ ሆኖ እንደቆየ እንገነዘባለን፡፡

የተወደዳችሁ የቤተ ክርስቲያናችን ተከታዮች ምእመናንና ምእመናት የቤተ ክርስቲያን አባቶችን አንድነት ለማየት ዘወትር ትናፍቁ እንደነበር ቅዱስ ሲኖዶስ ይገነዘባል፡፡ ሆኖም “ጊዜ ገቢር ለእግዚብሔር” እንደተባለው ከሁለት ዐሥርተ ዓመታት በላይ የአገር ቤትና የውጭ ሲኖዶስ በሚል በመካከላችን የጥል ግርግዳ ሆኖ ቆይቶ የነበረው ግንብ በመፍረሱና በዚህ እናንተ የመንፈስ ቅዱስ ልጆቻችን ፊት በአንድነት ስንቆም የሚሰማን ልባዊ ደስታ ዕጥፍ ድርብ ነው፡፡

በእኛ በአባቶቻችሁ መለያየት ምክንያት እናንተ የመንፈስ ቅዱስ ልጆቻችን ግራ ገብቷችሁ በኀዘን ለኖራችሁባቸው ዓመታት ካሳ እግዚአብሔር አምላካችን ፊቱን መልሶልን፣ በዐይነ ምሕረቱም ተመልክቶን ዕርቀ ሰላም ወርዶ በአንድነት ስንጸልይ አይታችሁ ኀዘናችሁ ወደ ደስታ እንደተለወጠ እርግጠኞች ነን፡፡

እንደሚታወቀው “ሰላም” የሚለው ቃል መልካም ነገር ሁሉ ተሟልቶና ተስተካክሎ መገኘቱን የሚያመለክት ቃል ነው፡፡ እግዚአብሔር አምላካችን የሰላምና የይቅርታ አምላክ መሆኑን ከዚህ ተጨባጭ ሁኔታ መገንዘብ እንችላለን፡፡ ሐዋርያዊት፣ ጥንታዊትና ተሪካዊት የሆነችው የኢትዮጵያ ኦርቶዶክስ ተዋሕዶ ቤተ ክርስቲያን በረጅሙ የታሪክ ጒዞዋ በሃይማኖት መሪዎቿ ብርታት፣ በሊቃውቶቿ ትምህርት፣ በካህናቶቿ አገልግሎትና በምእመናን ተከታዮቿ ጽንዐ -ሃይማኖት ህልውናዋና አንድነቷ ተጠብቆ መኖሩን ሁሉም የሚያውቀው ነው፡፡

በቀጣይም ከእኛ የቤተ ክርስቲያን አባቶችና ከእናንተ ከመንፈስ ቅዱስ ልጆቻችን የሚጠበቀው ይኸው የትናንት አባቶቻችንን ፈለግ በመከተል ለአገርና ለወገን የሚጠቅመውን ሥራ መሥራት ነው፡፡ በአሁኑ ጊዜ ሁላችንም እንደምንረዳውና እንደምንገነዘበው አገራችን ኢትዮጵያን ወደ ጥንተ ታሪኳ ለመመለስ እና ዜጐች ሁሉ ከአላዋቂነት መንፈስ ተላቅቀው ለሰው ልጆች ሁሉ የሚያስፈልገው መሠረታዊ ጉዳይ ተሟልቶላቸው በአገራቸው ሠርተው ፍሬ በረከት በዝቶላቸው፣ አገር ለቅቆ ከመሰደድ፣ ከርስ በርስ አላስፈላጊ ግጭት ራሳቸውን ጠብቀው በአገራቸው አምረው ደምቀው በሰላም በአንድነት እንዲኖሩ ለማድረግ በሕዝባችንም ሆነ በመንግሥታችን በኩል እየተደረገ ያለውን ጥረት ግቡን እንዲመታ ቤተ ክርስቲያናችን በብርቱ ትጸልያለች፤ የበኩሏን የሚጠበቅባትንም ሆነ የሚፈለግባትን ሁሉ ለማድረግ ዝግጁ ናት፡፡

በተለይም በአሁኑ ጊዜ በሁላችንም የዘወትር ጸሎትና ጥረት በፈቃደ እግዚአብሔር በቤተ ክርስቲያናችን የተገኘው አንድነትና ሰላም ቤተ ክርስቲያናችን በአገር ውስጥም ሆነ በውጭው ዓለም ለምታበረክተው መንፈሳዊና ማኅበራዊ አገልግሎት ምቹ ሁኔታ የፈጠረላት መሆኑ ተስፋችንና ራእያችንን ሰፊ ያደርገዋል፡፡ በአጠቃላይ ለዚህ የዕርቀ ሰላም ድርድር አሁን ላለንበት የሠመረ ውጤት እንድንበቃ ሊቃውንተ ቤተ ክርስቲያን፣ መላው ካህናትና ምእመናን ልጆቻችን እንዲሁም ችግራችሁ የእኛም ችግር ነው በማለት ከጐናችን በመቆም በጸሎት ስትረዱን ለነበራችሁ፣ ከዚህ እስከ ሰሜን አሜሪካ በመጓዝ ለሰላሙ ጥረት ላደረጋችሁ የሰላምና አንድነት ጉባኤ በቅድስት ቤተ ክርስቲያን ስም እናመሰግናለን፡፡

እንዲሁም ዕርቀ ሰላሙን በአጭር ጊዜ ውስጥ አከናውነው ለመጡት በሀገር ውስጥና ከሀገር ውጭ የሚኖሩት ሊቃነ ጳጳሳትን በእጅጉ እናመሰግናቸዋለን፡፡ በተለይም ክቡር ጠቅላይ ሚኒስትር ዶ/ር ዐቢይ አህመድ ቅድስት አገራችንን ለመምራት ከተሰየሙበት ጊዜ አንሥቶ በአገራችን እያሳዩት ያለው የሰላምና የአንድነት ጥሪና ተልእኮ ውጤት ጋር የቤተ ክርስቲያናችንን ጉዳይ አንዱ አገራዊ ችግር አድርገው በመመልከት መለያየቱ ተወግዶ አንድነት እንዲመጣ በምክር በማግባባትና በዕርቀ ሰላሙ ጉባኤ ላይ በመገኘት እንዲሁም ይህን የዕርቅና የአንድነት ማብሠሪያ መርሐ ግብር እንዲዘጋጅ በመፍቀድና መመሪያ በመስጠት ጭምር ያደረጉት አስተዋጽኦ ምንጊዜም ታሪክ የማይረሳው ሆኖ የሚኖር ተግባር በመሆኑ ክቡር ጠቅላይ ሚኒስትር ዶ/ር ዐቢይ አሕመድን በቅድስት ቤተ ክርስቲያንና በእናንተ በመላው ማኅበረ ካህናትና ማኅበረ ምእመናን ስም ከልብ በመነጨ ስሜት እናመሰግናቸዋለን፡፡

በመጨረሻም ቤተ ክርስቲያናችንን ለዚህ የዕርቀ ሰላምና አንድነት ማብሠሪያ ቀን አድርሶ በእንዲህ ዐይነቱ ታላቅ ጉባኤ እንድንገናኝ ያደረገ ሁሉን ቻይ የቤተ ክርስቲያናችን መሠረትና ራስ የሆነውን እግዚአብሔርን እናመሰግናቸዋለን፡፡

እግዚአብሔር አገራችን ኢትዮጵያንና ሕዝቦቿን ይባርክ፣ወስብሐት ለእግዚአብሔር አሜን!